Titus 2
1A KOE en padapadakeki duen me kon on lamalam en kamaur. 2Padaki on ol ma kan, ren der wukiwuk sili, a ren indand mau o nenin, o kelail ni poson, o ni limpok, o ni kanonama. 3Pil dueta li ma kan, ren wiawia duen me kon on saraui kan, ren der likinekine der lidun wain, a ren saunpadak en me mau, 4Pwe ren panaui li pulepul akan, en apapwali ar paud o pok on nair seri kan. 5Ren lelapok, min, apwali nan im ar akan, kadek, peiki on ar warok kan, pwe masan en Kot ender lalauela. 6Pil dueta manakap akan, panaui ir, ren lelapok. 7Ni wiawia mau kan karos koe kasaleda pein uk kaalemoni mau amen, ni om padak melel o lelapok. 8Kida padak en kamaur o namenokala, pwe me palian kitail en namenokala, o sota diar me sued kot men karaune kitail. 9Padaki on ladu kan, me ren peiki on ar saumas ni meakaros ren kaperen ir ada, o ren der ketiwo. 10Ren der pirap, a irail en mau o melel on irail, pwe ren kalinanada lamalam en Kot atail Saunkamaur ni meakaros. 11Pwe mak en Kot pwarado kamaureda aramas akan karos. 12O padapadaki on kitail, me kitail en muei san meakan me doo san Kot o inon sued en sappa, ap lelapok, o pun, o dadaureta me kon on ni sappa et. 13O auiauiki kapor mau, o sansal linan en atail Kot lapalap o atail Saunkamaur Kristus Iesus. 14Me sokonpaudeki pein i ki kitail, pwen dore san kitail sapun karos, o kamakelekel on pein i aramas, me a pan sapwilim aneki, me kin nantion wiawia mau karos. 15Mepukat padake kida, o panauiki, o kapun kelail on; sota amen me pan mamale kin uk.
Copyright information for
PONPDN